ती नसती तर.. ? या प्रश्नातच तिच्या असण्याची सर्व निर्विवाद उत्तर सापडतात अशी ती...

आई....! 

ओठांवरती गाणी डोळ्यांमध्ये पाणी,

मनातलं मनालाच सांगते काही

जग म्हणते तिला आई...

आई हा दोन अक्षरांचा शब्द, सांगून जातो जीवनाचा अर्थ

कारण ती नसेल तर सारं जीवनच आहे व्यर्थ...

ईश्वरास साद घालण्यास आईसारखी दुसरी अन्वर्थक नाही हाक,

त्याच्या प्रेमाची अनुभूती देणारी आईसारखी दुसरी नाही साथ...

मुलांचे सहस्त्र अपराध घालून पोटी त्याला हृदयाशी कवटाळते आई,

त्याच्याच उत्कर्षासाठी चंदनापरी सतत झिजते आई...

आई म्हणजे वात्सल्याची करुण करुण कथा आहे,

आजूबाजूच्या विलासी जगात तिची विरक्तीची प्रथा आहे...

विठ्ठल म्हणजे आई...

भारत म्हणजे आई...

गाय म्हणजे आई...

काम म्हणजे आई...

समस्त संस्कृती ही 

मातेचाच महिमा गाई...

कृष्णाची ती यशोदा आहे शिवबाची ती जिजा आहे,

प्रत्येक बाळाला घडविण्यात त्या माऊलीचीच कृपा आहे...

माता म्हणजे पवित्र अशी गंगा नदी,

माता म्हणजे जन्मानंतरचा पहिला वहिला मंगल विधी...

सर्व जगाचे उदात्तर श्रेष्ठत्तर असे स्वरूप आहे आई,

म्हणून सर्व देवतांच्या आधी नतमस्तक मी तिच्या पायी...

--------निकिता सु विचारे