तू मला विचारलंस,
"माझ्याजवळ ना पैसा, ना स्वतःचं घर,
साधी चारचाकी सुद्धा नाही..
तरी करशील माझ्याशी लग्न ?"
मी क्षणाचाही विलंब न करता 'हो' म्हटलं…
आतुरतेने म्हणालास,
"हे प्रेम म्हणावं की तडजोड ?
करत तर नाहीस ना कोणता त्याग ?"
अरे केवढे प्रश्न, कळेल हळूहळू
आता थोडा सबुरीनं वाग..
होता मला खरं तर तुझ्या मनगटावर विश्वास,
कर्तृत्वाने तू करशील हा भवसागरही पार..
खात्री होती मला तू पदरात टाकशील माझ्या
चांदण सुखाचं,
बस सोबत तुझ्या मला आधी खंबीर उभं रहायला हवं..
पैसा इतका मोलाचा नाही तो कमावता येईल दोघांना,
नजरेत फक्त आदर हवा जो बांधून ठेवेल मनाला..
पारखली होती मी तुझी हीच खात्रीशीर नजर,
तिच्यासाठीच मी केलं माझं सर्वस्व अर्पण..
माझ्या विश्वासाला कधी जाऊ देऊ नको तडा
कायम असाच शोभून राहो आपला अखंड जोडा..
निकिता सु. विचारे